Zamboanga: Sies rebelde NPA muerto na guerra na Sultan Kudarat

0
0

Seis myembros del New People’s Army (NPA) ya muri na un guerra contra con maga soldao na provincia del Sultan Kudarat.

Asegun con Major General Roy Galido, comandante del Joint Task Force Central, cay el guerra ya ocuri maga alas sinco y media Huwebes aga na Sitio Sinagandal, Barangay Chua na municipio de Bagumbayan.

Asegun con Galido cay ta man patrulya el maga soldao del 7th Infantry Battalion cuando ya dale sila encuentro y ya man guerra contra con dies maga armao rebelde NPA.

El guerra ya resulta na muerte del seis rebelde NPA myentras el otro cuatro ya istindi y escapa.

Si Galido ya habla cay el dies rebelde NPA amo maga sigidores de Dennis Dulonan alias Kalbo, el deputy Secretary del East Daguma Front del Far-South Mindanao Region.

Asegun cay si Dulonan tiene pendiente orden de aresto for el crimen de arson y frustrated murder.

Maga soldao ya puede recubri un riple AK-47, tres riple Armalite, maga bala, materiales de propaganda y maga cosas personal na lugar del guerra.

Myentrastanto, si Brigadier General Arturo Rojas, el acting commander del Western Mindanao Command, ya habla cay ay sustene sila de ila campanya para destrosa con el restante grupo del NPA na Central Mindanao. (B. Garcia, photo courtesy of 6th Infantry Division)

LEAVE A REPLY

Please enter your comment!
Please enter your name here