Dies rebelde New People’s Army voluntaryamente ya rindi con maga autoridad alla na provincia de Sur Cotabato.
Asegun con Coronel Richard Verceles, el operations chief del Area Police Command-Western Mindanao, cay el dies rebelde NPA ya rindi maga alas cuatro veinte del Huwebes tarde con maga personajes del 1205th Mobile Company del Regional Mobile Force Battalion-12 na Purok 6, Barangay Maltana, Tampakan, Sur Cotabato.
Asegun con Verceles cay el maga rebelde NPA quien ya rindi amo maga sigidores del Guerrilla Front-72 del Far-South Mindanao Region.
Ya entrega sila un calibre cuarenta’y sinco pistola, riple Carbine, un Shotgun, y un 9-millimeter pistola con maga bala.
Si Verceles ya habla cay el rindida del dies rebelde NPA es un resulta del un comprehensivo campanya de informacion del 1205th Mobile Company relatao na internal security operation nombra como el Oplan Bato. (B. Garcia, photo courtesy of Area Police Command- Western Mindanao)