Un rebelde New People’s Army (NPA) el ya muri na un encuentro contra con mga soldao na un lejanos lugar na provincia del Zamboanga del Norte.
Asegun con Brigadier General Elmer Suderio, comandante del 102nd Infantry Brigade, el tirahan ya ocuri Miyercoles aga na Barangay New Rizal, Sergio Osmeña, Zamboanga del Norte.
Asegun con Suderio con el rebelde NPA ya muri na tirahan ya conose como si Edwin Gulane alias Ka Joffer.
Mga soldao ya recubri tamen un calibre .45 pistola y mga cosas personal del mga rebelde NPA.
Con el resto de Gulane ya abandona de suyy mga compañeros, quien ya istindi para na diferente lugar.
Asegun con Suderio cay el tirahan ya ocuri cuando ya designa mga soldao el 53rd Infantry Battalion para checkya con el informacion de Jeffrey Ceñara sobre el presencia del mga rebelde NPA na Barangay Saad, Dumingag, Zamboanga del Sur.
Si Ceñara amo el barrio capitan del Barangay Saad, un sercano lugar del Barangay New Rizal, Sergio Osmeña.
Asegun con Suderio cay el mga rebelde NPA quien ya dale encuentro el mga soldao amo mga restante myembros del Western Mindnaao Regional Party Committee del rebelde grupo.
Asegun con Suderio cay ta ase sila el necesaryo areglo para lleva bolbe con el resto de Gulane na su familya.
Si Suderio ya rindi su gratitud con mga residentes quien ta continua supoirta con mga otoridad na mantencion de paz y orden na de ila comunidad. (B. Garcia) (Photo Courtesy of 53rd Infantry Battalion)