El pulisiya ya planta ya el formal asunto criminal contra con maga myembros del Bangsamoro Islamic Freedom Fighters (BIFF)-Karialan faction sobre el matansa del un official de pulis y otro pa na fiscaliya del provincia de Maguindanao.
Asegun con Coronel Richard Verceles, el operations chief del Area Police Command-Western Mindanao, el formal asunto contra con mga suspechao ya somete del Huwebes na oficina provincial del fiscaliya na Maguindanao.
Si Verceles ya nombra ocho del maga acusao como el siguente: Abdulkarim Lumbatan quien conosido tamen como si Guiapar Abdulkarim alias Bantukan Andong y alais Commander Boy Jacket; Commander Nasser Guinaid Saptulah; Kamid Kambal Asam quien conosido tamen como si Kamir Kambal y alias Mheds; Hamid Kambal; Sala Tunda; Johari Abdulbasser Guianaid; Phepe Saptula; Abdulrah Sapal alias Bro Sapali; y si Bobot Camsa alais Borgo.
Asegun con Verceles tiene pa otro myembros del BIFF-Karialan faction el envuelto na matansa de Tiniente Reynaldo Samsom y Corporal Salipudin Endab, pero nohay pa sila establisi de ila maga nombre.
Si Samsom y Endab ya muri cuando ya man ambush canila maga suspechao del Agosto treynta na Barnagay Kapinpilan, Ampatuan, Maguindanao.
Tres otro personajes del pulisiya el ya iri durante el incidente. Sila amo canda Master Sergeant Renante Quinilayo; Corporal Rogelio dela Cuesta y si Corporal Marc Clint Dayaday.
El grupo de Samson de camino para sirvi orden de aresto contra con Kamir Kambal cuando ya ase canila emboscada (ambush) el maga suspechao na Barangay Kapinpilan, Ampatuan, Maguindanao. (Bong Garcia, Jr., photo courtesy of Police Regional Office- Bangsamoro Autonomous Region)