Mga otoridad ya aresta con dos persona na separao campanya contra droga ilegal aqui na ciudad de Zamboanga.
El pulisiya local ya nombra con el dos arestao suspechao como canda Mohammad Amdain, cuarenta anios, y si Jepry Taby, treynta’y uno anios el edad.
Asegon con el Police Station 10 cay con Mohammad ya aresta na un buy-bust operation mga alas sinco sincuenta’y sinco ayer tarde na Barangay Patalon, este ciudad.
Durante su aresto, mga pulis ya puede encontra na posesyon de Mohammad un gramo de suspechao shabu con el valor de seis mil ocho sientos pesos y dosientos markao sen.
Myentrastanto, asegun con el Police Station 9 cay con Taby ya aresta na otro buy-bust operation mga alas ocho veinte ocho anoche alli na Zone 4, Barangay Cawit, este ciudad.
Mga pulis ya puede recubri na posesyon de Taby suspechao shabu con el valor de cuatro mil siete sientos sesenta, un pitaka, y dosientos markao sen.
El dos arestao suspechao detenido ahora myentras ta prepara ya para planta formal asunto canila. (April Boy Regino)