Ta ase ahora enbuscada el pulisiya local con el tres companieros del un arestao suspechao na incidente de tiro ayer alli na Calle Governador Camins, Barangay Canelar, este ciudad.
El incidente ya ocuri maga alas dies y media ayer aga que ya resulta na un pesona irido y aresto del un suspechao.
El Police Station 11 ya conose con el victima como si Bermar Martus y el arestao suspechao como si Omar Abdulla Pondoy, un residente de Barangay Mantivo, Sibuco, Zamboanga del Norte.
Asegun na investigacion cay si Martus muntao na vehiculo hunto con Enier Misuari cuando ya ataja y ya tira canila maga suspechao muntao na dos motorsiclo myentras pa salida sila na calle Governador Camins estaba na Canelar Moret.
Si Martus ya iri na braso myentras si Misuari librao na incidente.
Con Pondoy ya puede aresta mga personajes del Aviation Security Grouo-9, de quien quartel serca lang na lugar del incidente.
El tres companieros de Pondoy ya puede escapa y amo el objeto ahora del enbuscada del pulisiya local. (April Boy Regino)