Ya cuji ya tamen el mga personajes del Zamboanga City Police Station 10 (ZCPS10) producto de petrolio ilegalmente ta transporta na costa weste del ciudad de Zamboanga.
Asegun con Police Major Ramon Aquiatan, el hefe del ZCPS10, ya aresta sila con Marjon Otongan, 23, años el edad, un residente de Barangay Jatian, Sibuco, Zamboanga del Norte, quien ilegalmente ya transporta con el mga producto de petrolio.
Asegun con Aquiatan ta conduci sila “checkpoint” cuando ya ase sila para con el trak ta maneja si Otongan, para inspecciona na carretera del Barangay Sinubong, este ciudad, mga alas 11:45 del Martes denoche.
Si Aquiatan ya habla cay durante el inspeccion, ya descubri sila cay el trak ta maneja si Otongan ta carga 7 galon ta contene 210 litros de crudo, 24 galon y un baril con laman de 940 litros de gasolina con el estimao cantidad de P76,050 sin el necesaryo documento.
Puera con el mga galon y baril de gasolina y crudo, el trak ta maneja si Otongan ta carga tamen mga tanke de gasul. Con el mga cargamento ta transporta para na municipio de Sibuco Zamboanga del Norte.
Asegun con Aquiatan cay el transportada de gasolina sin propio documentos es un violacion del “Fire Code of the Philippines of 2008”.
El trak y mga producto de petrolio ya pone bajo el temporary custodiya del ZCPS10 y ay entrega na bombero para el propio disposicion.
Del Agosto 10, mga personajes del ZCPS10 ya cuji dos personas quien ilegalmente ta transporta gasolina na carretera del Barangay Sinubong.
Ya puede sila confisca 7 galon ta contene 210 litros de gasolina que tiene el valor de P14,700.
Con el gasolina ta lleva para na municipio de Sibuco, Zamboanga del Norte.
(B. Garcia)
(Photo Courtesy of ZCPS10)
