Un “tattoo artist” de quien nombre incluido na “drug watchlist” el ya aresta y P1.5 millon valor de suspechao shabu el ya confisca mga autoridad na campaña contra droga ilegal aqui na ciudad, el policia local ya habla del miercoles.
Si Coronel Alexander Lorenzo, el Zamboanga City Police Office (ZCPO) director, ya habla con el arestao suspechao ya conose como si Jeffrey Pilanga, 33 años el edad.
Asegun con Lorenzo, con Pilanga ya aresta na un “buy-bust operation” mga ala 1:07 del Miercoles aga na Purok Magic Rose Barangay Manicahan, en este ciudad.
Asegun con Lorenzo, ya puede recubri na posesion de Pilanga seis pakete de plastic de diferente grandor que ta contene 225.88 gramos de suspechao shabu con el valor de P1,535,984 y markao P500.
Si Lorenzo ya habla cay ya conduci el buy-bust operation el “City Drug Enforcement Unit” siguiendo el bisiada por cuantos dias sobre el actividades ilegal del arestao suspechao.
El suspechao detenido na facilidad de detencion na quartel del ZCPO en preparacion para el plantada del formal asunto contra con ele. (B. Garcia) (Photo Courtesy of ZCPO)
