Dos mga “most wanted” personas ya aresta el pulisiya na separao operacion de enforsa del ley na mga provincia del Zamboanga del Norte y Zamboanga Sibugay.
Con el mga arestao wanted personas ya conose como canda Hernani Donggon, 52 años el edad y si Agustin Santiago, 63 años el edad.
Asegun con Police Colonel Glenn Dulawan, el director del pulisiya na Zamboanga del Norte, con Donggon ya aresta maga alas 10:40 del Lunes aga na Barangay Motibot, Sindangan.
Si Dulawan ya habla cay si Donggon listao como el number uno “most wanted” persona na Sindangan, Zamboanga del Norte.
Si Donggon tiene pendiente orden de aresto por violacion del “Comprehensive Law on Firearms and Ammunition” con el piansa de P100,000 ya dale el un jusgado na ciudad de Dipolog, Zamboanga del Norte del July 7, 2022.
Con Donggon ya pone bajo na custodiya del pulisiya na ciudad de Dapitan, Zamboanga del Norte.
Asegun con Police Colonel Eduard Mallo, el director del pulisiya na Zamboanga Sibugay, cay con Santiago ya aresta maga alas 5:20 del Lunes tarde na Barangay Salipyasin, Kabasalan.
Si Mallo ya habla cay si Santiago amo el aka-cuatro “most wanted” persona na Kabasalan, Zamboanga Sibugay.
Si Mallo ya habla cay si Santiago tiene pendiente orden de aresto sin piansa por el crimen de rupto (rape) en relasyon con el ley que ta dale especial proteccion con el mga de bata contra na acto de abuso, exploitacion y discriminacion.
El orden de aresto contra con Santiago ya dale el jusgado del Ipil, Zamboanga Sibugay del Mayo 17, 2023.
Si Santiago ta esta ahora bajo el custodiya del pulisiya na na municipio del Kabasalan, Zamboanga Sibugay. (B. Garcia)