Un 43 años persona y su dos años apu ya iri na incidente de “hit and run” na Barangay Culianan, este ciudad, myentras con el suspechao ya aresta mga pulis na un “follow-up operation”.
El Zamboanga City Police Office (ZCPO) Station 4 ya nombra con el mga victima como si Emel Carpio, 43 años el edad y su dos años apu, si Hensden.
Base na investigacion cay si Carpio ta maneja motorsiclo y ta sigi ankas de suyu apu cuando alegaomente ya ase canila bangga si Azel Bernardo Duling, 17 años, quien ta maneja tamen motorsiclo mga alas ocho del Lunes denoche na Barangay Culianan, este ciudad.
Si Carpio y de suyu apu ya iri cuando ya man baliskat de ila motorsiclo por el puersa del bangga-an myentras si Duling enseguidas ya escapa.
Con Carpio y de suyu apu ya lleba na ospital para el curada medical.
Con Duling ya puede aresta mga personajes del ZCPO Station 4 na un “follow-up operation”. (B. Garcia)