Un persona el ya aresta y valor de P146,880 droga ilegal y armas de fuego el ya confisca mga autoridad na un campaña contra droga na provincia del Zamboanga del Sur, asegun con el policia del Martes.
Si Police Lieutenant Colonel Helen Galvez, el portavoz del mando del policia regional, nohay mas nombra con el suspechao puera lang de habla’r el arestao persona tiene el edad de 33 años.
Asegun con Galvez, con el suspechao ya aresta na un operacion de compra busta mga alas 9:01 del Lunes aga na Purok Valley, Barangay Dipolo, Molave, Zamboanga del Sur.
Asegun con Galvez, ya puede recubri na posesion del arestao suspechao mas o menos 21.6 gramos de suspechao shabu que tiene el valor de P146,880, un porta moneda, un markao P1,000 dinero, un calibre .38 revolver, un bolso bandolera, un celpon, y mga parafernales de droga ilegal.
Con el arestao suspechao ya pone bajo’l custodia del policia na ciudad de Pagadian para el propio disposicion.
Si Police Brigadier General Bowenn Joey Masauding, el director del mando regional del policia, ya comenda con el mga personajes del policia por el buen resulta del operacion de compra busta. (B. Garcia)