Zamboanga: Pulis irido na incidente de ‘ambush’

0
6

Ya iri el un pulis y nohay pasa nada con su dos uban na un incidente de ambush na ciudad del Lamitan, provincial de Basilan, asegun con el pulisiya del Sabado.

Asegun con Police Lieutenant Colonel Arlan Delumpines, el hefe del pulisiya na ciudad de Lamitan, el incidente ya ocuri mga alas 3:30 del Viernes tarde na Barangay Parangbasak, Lamitan.

Si Delumpines ya nombra con el irido pulis como si Police Staff Sergeant Jun Jabbal Arasal, designao na ciudad de Isabela, el capital del provincia del Basilan.

El mga uban de Arasal con quien nohay pasa nada ya conose como canda Rene Tanasain y si Arastud Asisoy, ambos mga residentes del Barangay Parangbasak.

Base na investigacion, ta maneja un vehiculo si Arasal y ta sigi conele junto canda Tanasain y Asisoy pasando na Carretera del Barangay Parangbasak cuando ya ripika de tiro canila el mga suspechao.

Asegun con Delumpines, ya iri si Arasal n acara por causa ya tupa conele el añico del espejo del vehiculo donde ya tupa el bala.

Si Arasal enseguidas ya enderesa para na quartel del pulisiya del ciudad de Lamitan y ya avisa le con el pulis sobre el incidente.

Asegun con Delumpines con el mga suspechao ya conose como canda Lipunan Docol, un CAFGU y si Lim Amaran, un miembro de Civilian Volunteer Organization (CVO). El mga suspechao ambos mga residentes del Barangay Parangbasak.

El pulisiya del ciudad de Lamitan ya busca para aresta con el mga suspechao quien ya escapa despues del incidente. (B. Garcia, photo courtesy of Lamitan City Police Station)

Leave a Reply