El autoridad ya confisca contrabando que tiene el valor de P7.5 millones na la mar del provincia del Basilan, el pulisiya ya anuncia del Sabado.
Asegun con el pulisiya con el mga contrabando ya confisca del Jueves aga na mar del Barangay Dasalan na municipio de Hadji Muhtamad, provincia de Basilan.
Asegun con el pulisiya del municipio de Hadji Muhtamad cay el de ila mga personajes ta conduci patrulla maritima cuando ya columbra sila con un jungkung con sinco tripulantes ta navega para na ciudad de Zamboanga estaba na provincia de Sulu.
El mga pulis ya descubri durante el inspeccion cay el jungkung ta carga 300 cajon de cigarillo que tiene el valor de P7.5 millones.
Asegun con el pulisiya, enseguidas ya aresta con el sinco tripulantes y ya confisca con el mga cigarillo despues que ya falla sila presenta documento del de ila cargamento.
Con el jungkung, tripulantes y cargamento ya pone bajo na custodiya del pulisiya del Hadji Muhtamad y ay entrega despues na Buro de Aduana para el propio disposicion. (B. Garcia, photo courtesy of Hadji Muhtamad Municipal Police Station)