El Police Regional Office-Bangsamoro Autonomous Region (PRO-BAR) ya designa 171 personajes para mantene paz y seguridad na Special Geographic Area (SGA) del Bangsamoro Autonomous Region in Muslim Mindanao (BARMM), asegun con el policia del Lunes.
Si Police Brigadier General Romeo Macapaz, el PRO-BAR director, ya encabesa con el ceremonia de despedida del mga pulis para na Special Security Task Group (SSTG) del Sabado na Campo General Salipada Pendatun na Parang, Maguindanao del Norte.
El SGA del BARMM compuesto de ocho municipios nombrao como el mga siguientes: Pahamuddin; Kadayangan; Nabalawag; Old Kabakan; Kapalawan; Tugunan; Ligawasan; y Malidagao.
El SGA compuesto del 63 barangays desde’l seis municipios del provincia de Norte Cotabato quien ya escuji queda parte del BARMM durante el pelbicito del 2019. Con el 63 barrios ya organiza en ocho municipios.
Asegun con Macapaz, el mga nuevo designao pulis hay guardia tamen con el venedero eleccion na Mayo 2025 y del primer eleccion de parliamentaria del BARMM na ocho municipios del SGA.
Ta esperansa si Macapaz cay el 171 pulis hay compli con el de ila obligacion con alto grado de profesionalismo, dedicacion, honor, integridad y corage.
Con el ceremonia de despedida ya atende el Abogao Marvin Mokamad, el director del servicio de asuntos internos y representante del Ministerio de Interior y Gobierno local del BARMM, hunto con el mga alcalde del ocho municipios.
Ya atende tamen el mga miembros del grupo de commando y personal regional, de quien presencia ya contribui con el exito y significancia del evento. (B. Garcia)