El oficina regional del Philippine Drug Enforcement Agency (PDEA) ya conferi Drug Free Workplace Marker con el departamento provincial de salud del Zamboanga del Sur, asegun con el PDEA del Lunes.
El conferida del marcador con el departamento provincial de salud, o PDOH, del Zamboanga del Sur, que ya hace del otro semana, ya encabesa si Maharani Gadaoni-Tosoc, el director regional del PDEA.
“Este marcador ta significa el dedicacion del PDOH para tene un ambiente segurao y libre de drogas,” si Gadaoni-Tosoc ya habla.
Asegun con Gadaoni-Tosoc, el reconocimiento es parte del iniciativa nivel nacional bajo’l mandato del Dangerous drugs Board (DDB) Regulacion Numero 13, serie de 2018, que ya requeri con mga agencias de gobierno establisa programas de lugar de tratabjo libre de drogas.
El PDOH de mas ante pa, ta implementa ya programa integral de lugar de trabajo libre de drogas. Este ta inclui campañas de promocion, educacion de empleyados, examin de droga, y medidas de intervencion para con aquellos quien necesita tratamiento y rehabilitacion.
El conferida del marcador hinde lang ta demostra el dedicacion del PDOH para promova el bienestar del mga emplyados, pero ta servi tamen como un ejemplo para sigui el otro agencias.
Con el reconocimiento, el PDOH ya refuerza su dedicacion y ya fomenta un segurao y productivo embiente de servicio publico. (B. Garcia)