Si Police Brigadier General Allan Nobleza, el director del Police Regional Office-Bangsamoro Autonomous Region (PRO-BAR), ya ordena con el hefe del policia na ciudad de Marawi para intensifica el campaña de inteligencia na mencionao ciudad.
Si Nobleza ya dale su orden cuando ya visita le con el mga personajes del Marawi City Police Office del Jueves.
Asegun con Nobleza, necesita intensifica con el campaña de inteligencia y fortalece el seguridad para privini el otravez soceso de violente incidente na ciudad.
Cuatro personas ya muri y 50 otros el ya iri cuando ya rebenta un bomba adentro na Dimaporo gymnasium del Mindanao State University (MSU)-Marawi durante un misa de Catolico del Domingo aga.
Durante su visitada, si Nobleza ya revisa con el analisis de crimen y mapa del crimen y tambien el designacion del mga pulis para asegura el proteccion y seguridad del publico.
Del Miercoles, si Nobleza ya visita con seis irido victima del rebentada de bomb na Dimaporo gymnasium del MSU-Marawi campus.
El mga victima ta esta admitido y bajo el tratamiento medical na Amai Pakpak Medical Center, mientras el losdemas victima ya dale alta ya ha hospital.
(B. Garcia, photo courtesy of PRO-BAR)
