El mando regional del policia, o Police Regional Office-9 (PRO-9), ya premia dos medallas con Police Senior Master Sergeant Ryan Mariano por su valenterias y dedicacion na servicio.
Si Police Brigadier General Bowenn Joey Masauding, el PRO-9 director, personalmente ya premia medallas cuando ya visita le con Mariano del Sabado na hospital.
El mga medallas ya recivi si Mariano ta inclui el Medalya ng Sugatang Magiting y Medalya ng Kagalingan, un premio ya simboliza su esfuerzos extraordinarios.
Ya dale tamen si Masauding ayuda financial con Mariano, quien ta recupera ahora na uno del mga hospital local.
Si Mariano ya neutraliza dos personas mas buscada durante un tirahan que ya ocuri cuando designao ele rendi servicio de seguridad na paroquia del Our Lady of Mount Carmel na Barangay Ayala del visperas de año nuevo.
Ya salva si Mariano pero ya heri tamen ele durante el tirahan.
El tirahan ya socede cuando ya tira el dos personas mas buscada con Mariano, quien enseguidas ya invisti canila que ya resulta na muerte del dos suspechao.
Si Masauding ya expresa su gratitud y apreciacion con Mariano por su dedicacion y valor en liña del su deber.
Si Masauding ya enfatiza el importancia del recononcimiento del mga sacrificios que ya hace el mga personajes del policia y ya asegura con Mariano y su familia el inquebrantable supporta del PRO-9.
El visitada ta demostra el dedicacion del PRO-9 para reconoce el corage del mga pulis y na mantenida de seguridad y proteccion del comunidad. (B. Garcia)