El Police Regional Office-9 (PRO-9) ya kita na servicio con cuatro pulis por causa envuelto sila na un robo del Noviembre 14, 2023 aqui na ciudad, asegun con el policia local del Miercoles.
Aquellos con quien ya kita na servicio por mala conducta grave impropio de un oficial de policia amo canda Police Lieutenant Ariel Jolatoria, Police Senior Master Sergeant Al-Najir Ynawat, Police Staff Sergeant Edcel Nicolas, and Patrolman Rayan Apostol.
El orden de despido ya firma si Police Brigadier General Bowenn Joey Masauding y efectivo del Enero 12, 2024.
El asunto contra con el cuatro pulis ya principia despues que ya keda sila envuelto na P2.1 millon robo ga Barangay Tetuan, en este ciudad, del Noviembre 14, 2023.
Mas temprano, si Police Colonel Alexander Lorenzo, el Zamboanga City Police Office director, ya habla ya puede establisa cay envuelto el cuatro na P2.1 millon robo por medio del de ila coche de escape que ya arquila sila base na video que ya puede captura na camara de seguridad.
Con el cuatro pulis ya aresta na separao operacion de seguimiento aqui na ciudad del November 18, 2023.
Asegun pa con Masauding, el PRO-Zamboanga Peninsula hinde ta tolera cualquier mala conducta del mga pulis, y ay toma propio acciones para disciplina para mantene el confianza del publico.
(B. Garcia)
