Un jovencito el ya aresta y P1.1 millon valor de droga ilegal el ya confisca el mga autoridad na un campaña contra droga na provincia del Zamboanga del Sur, asegun con el policia del Jueves.
Si Police Lieutenant Colonel Gilzen Niño Manese, el jefe del policia na ciudad de Pagadian, ya identifica con el arestao suspechao como si Benhalid Ampuan, 19 años el edad y un residente de Barangay Tambacan, ciudad de Iligan.
Asegun con Manese, con Ampuan ya aresta el mga operativas del policia na un operacion de compra busto mga alas 2:32 del Martes tarde na Purok Malipayon, Barangay Dao, ciudad de Pagadian, el capital del provincia del Zamboanga del Sur.
Si Manese ya habla, ya confisca na posesion de Ampuan 160 gramos de suspechao shabu enpaquetao na ocho termosellada transparente sobrecitos plastico que tiene el valor de P1,108,400, un celpon, siete pedaso de P1,000 “boodle money” que ya pone insima un real P1,000 como markao dinero, un bolsa ecologia, y un cajon.
Asegun con Manese, con Ampuan hay planta caso por violacion del Ley Integral de Drogas Peligrosas del 2002 o el Comprehensive Dangerous Drugs Act of 2002.
Con Ampuan ya pone bajo’l custodia del policia na ciudad de Pagadian. (B. Garcia)