El mga autoridad ya aresta un persona y ya confisca valor de P199,404 smuggled cigarillo na carretera nacional del provincia de Zamboanga Sibugay, asegun con el policia del Jueves.
El policia nohay mas nombra con el arestao persona quien un 33 años chufer de triciclo con quien ya coge mientras ta transporta productos de tabaco na camino del Buug para Diplahan.
Asegun con el policia, con el chufer ya aresta ta transporta smuggled cigarillo mga alas 11:25 del Martes denoche na carretera nacional, Purok 19, Barangay Poblacion, Buug, Zamboanga Sibugay.
Asegun con el policia, ya confisca na triciclo del arestao chufer tres cajones y 24 resmas de cigarillo con el valor de P199,404.
Con el arestao chufer de triciclo y el mga confisca cigarillo ya pone bajo’l custodia del policia na municipio del Buug para el propio disposicion.
Con el transportada del mga smuggled cigarillo ya coge el mga personajes del Regional Intelligence Division-9, en colaboracion con el policia na municipio del Buug, Zamboanga Sibugay. (B. Garcia)