Dos personas sin trabajo el ya aresta y ya confisca valor de P104,000 droga ilegal el mga autoridad na un operacion contra droga na provincia del Sulu, asegun con el policia del Jueves.
Si Police Brigadier General Prexy Tanggawohn, el director del Police Regional Office-Bangsamoro Autonomous Region (PRO-BAR), ya habla el dos arestao suspechao ambos mga hombre que tiene el edad de 27 y 32 años, y mga residentes del Barangay Laud Kulasi y Barangay Kulasi, Maimbung, respetivamente.
Asegun con Tanggawohn, con el dos suspechao ya aresta na un operacion de compra busto mga alas 10:30 del Miercoles aga, na Barangay Bualo Lipid, Maimbung, Sulu.
Si Tanggawohn ya habla, ya confisca na posesion del dos arestao suspechao 15.3 gramos de suspechao shabu enpaquetao na 13 termosellada transparente sobrecitos plastico que tiene el valor de P104,000, un bolso, P500 markao dinero, P470 dinero de varias denominaciones que posible parte del entrada na vendida de shabu, y un plastico.
Con el dos arrestao suspechao ya detene na quartel del policia na Maimbung y hay enfrenta sila el caso por violacion del Ley Integral de Drogas Peligrosas de 2002.
Con el dos suspechao ya aresta el combinao grupo del policia y agentes de Philippine Drug Enforcement Agency (PDEA) na region autonomo. (B. Garcia)Â