Un individual clasificao como uno del mga persona mas buscada el ya aresta mga autoridad na provincia del Maguindanao del Sur, asegun con el policia del Jueves.
El Police Regional Office-Bangsamoro Autonomous Region (PRO-BAR) ya nombra con el arestao suspechao como si Commander Bayawak, el numero tres persona mas buscada na region autonomo.
Asegun con el PRO-BAR, con Bayawak ya aresta durante el implementacion del un orden de aresto mga alas dos del Miercoles tarde na Barangay Poblacion, Datu Piang, Maguindanao del Sur.
Asegun con el policia, si Bayawak tiene pendiente orden de aresto por el crimen de multiple attempted murder con recomendao piansa de P120,000, incendio destructivo y violacion del ley antiterorista de 2020 que ya dale el un corte na ciudad de Cotabato del Octubre 4, 2021.
Asegun con el policia, ya confisca na posesion de Bayawak un calibre .45 pistola con clip y ocho bala y un tarjeta de identificacion.
Asegun con el policia, si Bayawak amo el antes vice chairman del Bangsamoro Islamic Freedom Fighters (BIFF)-Bungos faction base na Datu Piang, Maguindanao del Sur. (B. Garcia)