Cagayan de Oro – MAPASALAMATON ang moabot 130 ka mga delegasyon nga naglangkob sa mga konsehal ug barangay officials sa Tabaco City, Albay sa ilang gipahigayon nga benchmarking activity sa kagamhanang lokal sa Cagayan de Oro, Hunyo 5 ning tuig.
Personal usab nilang nasaksihan ang talagsaong programa sa syudad matag adlaw’ng Miyerkules nga ‘Peoples Day’ ug nahimamat si Mayor Rolando ‘Klarex’ Uy.
Mainitong gi-abi-abi usab nila ni City Administrator Atty. Roy Hilario Raagas, Community Affair Office Department Manager Mr. Oliver Egypto ug Liga ng mga Barangay Vice President/Gusa Punong Barangay Marlo Tabac nga mirepresentar ni City Councilor Yan Lam Lim ang mga bisita.
Nahimong mabungahon ang maong benchmarking human sa pagbinayloay sa mga kasinatian sa matag syudad ug sa hiniusang pagtuo sa importanteng papel sa barangay sa pag-atubang sa mga problema, kalamidad ug pagpatuman sa batakang serbisyo ug programa ngadto sa katawhan.
Lakip sa giadtoan ug gisusi sa delegasyon ang Material Recovery Facility sa syudad nga nahimutang sa Upper Dagong, Barangay Carmen, buhatan sa City Economic Enterprises and Business Development Administration ug City Disaster Risk Reduction Management Office ug personal nga nahinabi si CDRRMO Department Manager Nick Jabagat.
News and photo courtesy of CIO CDO