El mga autoridad ya confisca valor de P3.5 million contrabando y ya aresta sinco personsas na separao operaciones contra smuggling na Zamboanga Peninsula, asegun con el policia del Miercoles.
El mando regional del policia o Police Regional Office-9 (PRO-9), ya habla cay na uno del mga operaciones, el mga pulis ya aresta con el dos personas muntao na un jungkung mga alas 4 del Domingo aga na mar del municipio de Tukuran na provincia del Zamboanga del Sur.
Asegun con el policia, ta conduci patrulla el mga pulis cuando ya columbra sila con el un jungkung ta navega para na direccion del municipio de Tukuran.
Asegun con el policia, ya confisca desde’l jungkung 24 cajon de smuggled cigarillo que tiene el valor de P1,375,000.
Na otro operacion, ya arresta el mga pulis con dos personas y ya cogi con un trak ta transporta 800 reams de smuggled cigarillo que tiene el valor de P916,000 mientras ta conduci sila checkpoint mga alas 5:26 del Domingo aga na Barangay Romarate, Aurora, Zamboanga del Sur.
Del Sabado, el mga pulis ya cogi tamen un trak ta transporta smuggled cigarillo mga alas 3:30 del tarde na municipio del Diplahan, Zamboanga Sibugay.
El mga pulis ya confisca abordo na trak 21 cajon de smuggled cigarillo con el valor de P1,203,300.
Asegun con el policia, el mga arestao suspechao y mga confiscao smuggled cigarillo presentamente bajo’l custodia del mga respetivo quartel del policia onde ya hace el aresto y confiscacion del mga contrabando para el documentacion y proprio disposicion.
Si Police Brigadier General Bowenn Joey Masaudding, el director del mando regional del policia, ya alaba con el mga personajes del policia envuelto na exitoso operaciones que ya resulta na aresto del sinco suspechao y confiscacion del mas de P3 millon valor de contrabando. (B. Garcia)