Dos personas el ya aresta y ya confisca P9.7 millones valor de contrabando el mga autoridad durante un operacion de aplicacion de leyes en este ciudad, asegun con el policia local del Lunes.
Asegun con Coronel Alexdander Lorenzo, el director del Zamboanga City Police Office (ZCPO), con el dos arestao personas ya conose como canda Talib Alpa, 51 años el edad y si Jomar Alid, 25, ambos mga residentes de Barangay Talabaan, en este ciudad.
Asegun con Lorenzo, canda Alpa y Alid ya aresta mga personajes del 2nd Zamboanga City Mobile Force Company (2ZCMFC) mga alas 10:20 del Domingo denoche na vicinidad del Isla de Sta. Cruz, en este ciudad.
Asegun con Lorenzo, ta man patrulla el mga personajes del 2ZCMFC cuando ya columbra sila canda Alpa y Alid muntao na un jungkong que tiene el marka “Ridzna” y ta navega para na direccion del ciudad de Zamboanga.
Si Lorenzo ya habla, ya descubri mga personajes del 2ZCMFC cay lleno de cajon de diferentes clase de cigarillo el jungkong de canda Alpa y Alid durante el inspeccion.
Base na investigacion, asegun con Lorenzo, ta carga el jungkong total de 170 cajon de diferentes clase de cigarillo que tiene el valor de P9.7 millones.
Si Lorenzo ya habla, enseguidas ya aresta con Alpa y Alid y ya confisca con el mga cajon de cigarillos y jungkong despues que ya falla sila presenta documentos del de ila cargamento estaba na provincia de Sulu. Ya confisca tamen canila dos un celpon.
Si Lorenzo ya habla, con Alpa y Alid incluido el jungkong y mga cajon de cigarillo ya lleva na quartel del 2ZCMFC y esperansao entrega na Buro de Aduana para el propio disposicion. (B. Garcia, photo courtesy of 2ZCMFC)