Seis personas el ya salva el un varco estrangero de cargamento na vicinidad del Isla de Pangutaran, na provincia del Sulu, asegun con el fuerza naval del Lunes.
Asegun con Rear Admiral Donn Anthony Miraflor, el comandante del Fuerza Naval na Oeste Mindanao o Naval Forces Western Mindanao (NFWM), con el seis personas ya salva del Sabado 38 milla nautico oeste del isla de Pangutaran.
Nohay mas nombra si Miraflor con el seis personas que ya salva el varco estrangero de cargamento nombrao como el M/V Navios Lumen que ta carga el bandera del Panama.
Base na investigacion, el M/V Navios Lumen ta navega para na de ila siguiente puerto de escala na Australia cuando ya columbra el mga tripulantes del varco con seis personas ta agara na costao del de ila vinta de makina y ta man anud na mar.
Enseguidas ya man manaiobra el M/V Navios Lumen y ya salva el mga tripulantes del varco con el seis personas y ya ayuda canila.
Ya man baliskat de ila vinta de makina por causa de grande mareada.
El NFWM ya designa con el BRP-Jose Loor Jr. para anda encontra el con seis personas despues que ya coordina el mga tripulantes del M/V Navios Lumen con el fuerza naval.
Asegun con Miraflor, el BRP-Jose Loor Jr. ya transporta con el seis personas desde’l M/V Navios Lumen na vicinidad del pasada del Sibutu, Tawi-Tawi para na pantalan de Lamion na Bongao.
Ya dale comida y agua con el seis personas y despues ya entrega canila na Ministry of Social Service and Development (MSSD) y Municipal Disaster Risk Reduction Management Office del Bongao para el examinacion medical, consejo y otro ayuda antes que ya permiti canila bolbe na de ila familia. (B. Garcia, photo courtesy of NFWM)