Dos personas el ya aresta y mas o menos valor de P116,688 droga y un pusil el ya confisca mga autoridad na dos separao campaña contra droga ilegal aqui na ciudad de Zamboanga, asegun con el policia local del Miercoles.
Asegun con el policia local, con el dos arestao personas ya conose como canda Marie Thonie Francisco, 33 años el edad, y si Nurmin Asdali alias Nurmin Asaki, 37.
Asegun con el policia, con Francisco ya aresta na un “buy-bust operation” mga alas 3:26 del Martes tarde na Sitio Villa Sta. Maria, Barangay Sta. Maria, en este ciudad.
El policia ya habla, ya puede confisca na posesion de Francisco 12.16 gramos de suspechao shabu enpaquetao na tres paquetes de plastic que tiene el valor de P82,688 y P200 markao sen.
Asegun con el policia, con Asdali ya aresta na separao buy-bust operation mga alas 5:15 del Martes tarde na Paseo de Star Apple, Barangay Sangali, en este ciudad.
Asegun con el policia, ya puede recubri na posesion de Asdali sinco gramos de suspechao shabu enpaquetao na tres paquetes de plastic que tiene el valor de P34,000, un calibre .45 pistola con mga bala, y markao sen.
Asegun con el policia, ya detene con el dos arestao suspechao en preparacion para na plantada del asunto contra canila dos por violacion del Comprehensive Dangerous Drugs Act of 2002.
(B. Garcia)