Un persona el ya aresta y P1.5 millones valor de smuggled cigarillo el ya confisca el mga autoridad na provincia del Maguindanao del Norte, asegun con el policia del Sabado.
El Police Regional Office-Bangsamoro Autonomous Region (PRO-BAR) nohay mas nombra con el arestao persona quien tiene el edad de 28 años y residente de Barangay Tambara, Malabang, Lanao del Sur.
Asegun con el PRO-BAR, con el persona ya aresta mga ala una del Jueves tarde na Barangay Nituan, Parang, Maguindanao del Norte.
Asegun con el PRO-BAR, el mga pulis ya conduci un operacion de checkpoint cuando ya recivi sila informacion cay tiene transportada del mga smuggled cigarillo na municipio de Parang.
El PRO-BAR ya habla, enseguidas ya aresta el mga pulis con el chufer de un vehiculo cuando ya falla le presenta mga documentos del mga cigarillo que ta transporta ele durante el inspeccion na checkpoint.
Asegun con el policia, ya confisca abordo na vehiculo del arestao chufer 42 cajon de cigarillo sin documentos que tiene el valor de P1,554,000.
Con el mga confiscao cigarillo, hunto con el vehiculo y chufer ya pone bajo’l custodia del policia na municipio del Parang para mas del investigacion, documentacion y preparacion para el plantada del caso contra con el suspechao. (B. Garcia)