Un persona el ya aresta el mga autoridad na un operacion contra droga ilegal na ciudad de Lamitan, provincia de Basilan, asegun con el policia del Lunes. Si Police Lieutenant Colonel Elmer Solon, el jefe del policia na ciudad de Lamitan, nohay mas identifica con el arestao suspechao con quien ya aresta na un operacion de compra busto mga alas 8:30 del Sabado denoche na Paseo de Lemoncito, Barangay Matatag, en aquel ciudad. Asegun con Solon, con el suspechao enseguidas ya aresta
despues que ya vende un termosellada transparente plastico sobrecito de suspechao shabu en cambio de P200 con un secreta del policia. Asegun con Solon, ya confisca na posesion del arestao suspechao mas o menos sinco gramos de suspechao shabu que tiene el valor de P34,000. Ya recubri tamen na posesion del arestao suspechao P200 marcao dinero, un portamoneda, y un lighter. Asegun con Solon, con el suspechao ya detene en preparacion para el plantada del caso contra conele por violacion del Secciones 5 y 11 del Ley Integral de Drogas Peligrosas. (B. Garcia