Un individual listao como el numero siete persona mas buscada na Region 12 el ya aresta el mga autoridad na Sur Cotabato, asegun con el Area Police Command-Western Mindanao (APC-WM) del Martes.
Base na report de Police Brigadier General Percival Augustus Placer, el director del policia na Region 12, el APC-WM ya nombra lang con el arestao persona como si alias Dodong, 68 años el edad, un obrero y residente de Barangay Bukay Pait, Tantangan, Sur Cotabato.
Asegun con el APC-WM, con Dodong ya aresta na un operacion de aplicacion de ley por medio de servi’r orden de aresto del otro semana na su residencia na Barangay Bukay Pait, Tantangan.
Asegun con el APC-WM, si Dodong tiene pendiente orden de aresto por el crimen de tres cuentas de actos de lascivia con el recomendao piansa de P120,000 cada un cuenta que ya dale el un corte de Sur Cotabato.
El APC-WM ya habla, con Dodong ya aresta el combinao personajes del policia del municipio de Tantangan, Regional Special Operations Group-12 y South Cotabato Intelligence Unit. (B. Garcia)