El mga autoridad ya aresta un persona y ya confisca P120,000 valor de pescao na un operacion de aplicacion de ley na provincia del Sultan Kudarat, asegun con el policia del Sabado.
El Philippine National Police-Maritime Group (PNP-MG), nohay mas nombra con el arestao persona con quien ya aresta mga alas 5:50 del Jueves tarde na desembarque de pescao na Barangay Tibpuan, Lebak, Sultan Kudarat.
Asegun con el PNP-MG, con el persona ya aresta por causa ya coge conele ilegalmente ta transporta pescao.
Asegun con el PNP-MG, ya confisca na posesion de arestao persona P120,000 valor de tulingan y portador de pescao que tiene el valor de P300,000.
Asegun con el PNP-MG, con el persona ya viola con el Seccion 128 del Ley el Republica 10654 en relacion con el Seccion 30 del Orden Administrativa Pesquera 233, Serie de 2010, que ta goberna con el transportada de productos marino.
Con el arestao suspecha ya pone bajo’l custodia del policia del Sultan Kudarat Maritime Police Station y con el confiscao pescao ya entrega na
Oficina de Pesca y Recursos Acuaticos-oficina satelital na municipio del Lebak.
Asegun con el policia, el operacion ta descata con el en curso esfuerzos del PNP-MG para enforsa con el reglamento de pesca y asegura el cumplimiento con el requisitos de permiso de transporte. (B. Garcia)