El mga autoridad ya destrosa un plantacion de marijuana durante un campaña contra droga ilegal na provincia de Sulu, asegun con el Philippine Drug Enforcement Agency (PDEA).
Asegun con el PDEA na Bangsamoro Autonomous Region un Muslim Mindanao (PDEA-BARMM), con el plantacion de marijuana ya destrosa na Sitio Mangal-Mangal, Barangay Punjungan, Kalingalan Caluang, Sulu del Domingo.
Asegun con el PDEA-BARMM, antes que ya descubri y ya destrosa con el plantacion, el mga operativas de ila ya confisca valor de P6,000 seco ojas de marijuana desde con dos personas quien ya cultiva con el plantacion na un “buy-bust operation”.
Sin embargo, el PDEA-BARMM ya habla cay el dos cultivadores del plantacion con quien ya conose como canda Rene Onji y Amah Jul Onji ya escapa cuando ya gole sila cay ta ase sila transaccion con mga agentes del PDEA.
Asegun con el PDEA-BARMM, ya aranca sila total de 15,000 pono de marijuana que tiene el valor de P12 millon.
Con el mga marijuana ya siembra na un 500 metros cuadrados lote na Sitio Mangal-Mangal, Barangay Punjungan, Kalingalan Caluang.
Asegun con el PDEA-BARMM, con el plantacion de marijuana ya destrosa con el ayuda del policia, militar y personajes del National Intelligence Coordinating Agency.
(B. Garcia, photo courtesy of PDEA- BARMM)
