Maga operativas del Criminal Investigation and Detection Group (CIDG) ya aresta con un persona de edad durante el campanya contra juego ilegal na provincia del Zamboanga del Sur.
Si Coronel John Francis Encinareal, hefe del CIDG na rehyon, ya nombra con el arestao persona como si Diosdado Antawag, sesenta’y dos años el edad.
Asegun con Encinareal cay con Antawag ya aresta maga alas sinco sincuenta del Domingo tarde na Purok Santan, Barangay Sta. Maria, Pagadian City, Zamboanga del Sur.
Asegun con Encinareal cay con Antawag ya cuji na acto ta colecta tayada de ilegal swertres.
Ya puede recubri na posesion de Antawag mil quinientos pesos cantidad de tayada, lista de tayada, cellphone, markao sen, y otros pa maga cosas ta usa na coleccion de tayada para na ilegal swertres.
Con Antawag ya pone bajo na custodiya del oficina del CIDG na Zamboanga del Sur myentras ta prepara el maga documnetos para el plantada del formal asunto contra conele. (Bong Garcia, Jr.)(Photo Courtesy of Criminal Investigation and Detection Group IX)