Un objetivo de alto valor, o high-value target (HVT), el ya aresta mga autoridad y ya confisca valor de P3.4 millones droga ilegal na un campaña contra droga na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Jueves.
El PDEA-BARMM ya identifica con el arestao HVT como si Amenola Sabdullah, 40 años el edad y residente de Barangay Tubok, Malabang, Lanao del Sur.
Asegun con el PDEA-BARMM, con Sabdullah ya aresta na un operacion de compra busto del Miercoles na Barangay Bacayawan, Malabang, Lanao del Sur.
Asegun con el PDEA-BARMM, ya confisca na posesion de Sabdullah 500 gramos de suspechao shabu que tiene el valor de P3.4 millones, dinero de compra busto, y dos tarjetas de identificacion del arestao suspechao.
Con Sabdullah ya detene na carcel del PDEA-BARMM en preparacion para el plantada del asunto contra conele por violacion del Ley Integral de Drogas Peligrosas de 2002.
Con Sabdullah ya aresta un dia despues el PDEA-BARMM y policia ya aresta dos HVTs y ya confisca valor de P6.8 millones suspechao shabu na ciudad de Cotabato.
El PDEA-BARMM ya nombra con el dos arestao HVTs como canda Ebrahim Esmael, 43 años el edad, y si Dali Abdulkarim, 49, con quien ya aresta del Martes na Barangay Rosary Heights 9, ciudad de Cotabato. (B. Garcia)