Tres high-value targets (HTVs) el ya aresta y ya confisca valor del P102,000 droga ilegal cuando ya bunca mga autoridad un cuarto de droga, o drug den, na Maguindanao del Sur, asegun con el Philippine Drug Enforcement Agency (PDEA) del Jueves.
Asegun con Gil Cesario Castro, el director regional del PDEA na Bangsamoro Autonomous Region in Muslim Mindanao (PDEA-BARMM), con el tres arestao HVTs ya conoce como canda Basser Akmad, 30 años el edad y el mantenedor del cuarto de droga, su dos compradores como canda Watari Sabel y Alison Mamaluba.
Asegun con Castro, con el tres suspechao ya aresta cuando el mga operativas ya conduci operacion de compra busto que ya resulta na bungcada del cuarto de droga ilegal na Barangay Upper Siling, Buluan, Maguindanao del Sur del Miercoles.
Si Castro ya habla, ya puede confisca na bungcao cuarto de droga mas o menos 15 gramos de suspechao shabu enpaquetao na 14 diutay sobrecitos que tiene el valor de P102,000, dinero de compra busto, diferentes clase de parafernales de droga ilegal, y varias tarjetas de identificacion.
Asegun con Castro, el mga arestao suspechao detenido na carcel del PDEA-BARMM en preparacion para el plantada del caso contra canila por violacion del Comprehensive Dangerous Drugs Act of 2002.
Asegun con Castro, el exitoso operacion es un testamento del inquebrantable compromiso del mga agencias de enforsador de leyes para limpia con el comunidad desde el delicao droga y personalidad de droga ilegal.
Si Castro ya habla, con el cuarto de droga ilegal ya bungca el operativas del PDEA-BARMM con el suporta del policia y militar. (B. Garcia)
