Un individual listao como el numero dos persona mas buscada el ya aresta y valor de P1.4 millon droga ilegal el ya confisca el mga autoridad na costa este del ciudad.
Asegun con el policia local, con el arestao individual ya conose como si Udang Absara, 60 años el edad y listao como el number dos pesona mas buscada na jurisdiccion del Zamboanga City Police Station 3.
Asegun con el policia, con Absara ya aresta durante un operacion de aplicacion de ley por medio de servi’r un orden de aresto mga alas 11:40 del Domingo aga na Sitio Arakani, Barangay Sangali, 25.34 kilometros este del ciudad.
Asegun con el policia, si Absara tiene pendiente orden de aresto por violacion del ley del republica numero 9165 o mas conosido como el “Comprehensive Dangerous Drugs Act of 2002” sin recomendao piansa que ya dale el un corte del ciudad de Zamboanga del Febrero 16, 2024.
Ademas, ya puede recubri na possession de Absara un grande transparente sobrecito de plastico que ta contene suspechao shabu con el valor de P1.4 millon durante el un inspeccion.
Ya puede tamen recubri con el suspechao un bolsa de cinturon.
Asegun con el policia, con el suspechao ya detene en preparacion para el plantada del asunto contra conele por violacion del ley de republica numero 9165. (B. Garcia)
