El 101st Infantry Brigade que ta encabesa si Brigadier General Alvin Luzon ya orquesta otro acuerdo de paz entre dos man contrario familia na provincia del Basilan, asegun con el militar del Miercoles.
Con el acuerdo de paz ya facilita si Tiniente Coronel Michael Colanta, el comandante de 45th Infantry Battalion, entre el familia de Immam Hasalul y Yusrie Isnanul ambos mga residentes de Barangay Bohe Suyak, Ungakaya Pukan, Basilan.
Asegun con Colanta, el ceremonia de acuerdo de paz entre el familia Hasalul y Isnanul ya hace del Lunes tarde na quartel del 45IB na Barangay Bohe Pahu, Ungkaya Pukan.
Asegun con Colanta, el playto entre el familia Hasalul y Isnanul amo por causa de policia, que ya resulta na violencia y matansa del mga miembros de familia desde otro año pa.
Si Colanta ya habla, ya servi de testigo mga alto oficiales del militar, policia, gobierno provincial de Basilan y del concierne municipio, region autonomo, mga representantes del consejo de ancianos, y lideres del Moro Islamic Liberation Front con el ceremonia de acuerdo de paz entre el familia Hasalul y Isnanul.
El acuerdo de paz entre el familia Hasalul y Isnanul amo el siguiente acuerdo que ya orquestra el 101st Infantry Brigade del Lunes na Basilan.
El primero, amo el acuerdo de paz entre el familia Latip y Mustapa que ya hace del Lunes aga na quartel del 101st Infantry Brigade na Barangay Tabiawan, ciudad del Isabela, el capital del provincia de Basilan. (B. Garcia)