El Naval Forces Western Mindanao (NFWM) en colaboracion con otro agencias de govierno ya salva con 10 victima de trafico humano aqui na ciudad de Zamboanga.
Asegun con Rear Admiral Donn Anthony Miraflor, el comandante del NFWM, con el mga victima ya salva na un privado pantalan na Barangay Baliwasan, este ciudad del Miyercoles.
Base na investigacion cay el mga salvao victima sabe el condicion del de ila supuesto trabajo na otro pais sin propio documentos.
Asegun con el mga librao victima cay ya invita un tal “Joy” de Titay, Zamboanga Sibugay para trabaja na Malaysia cay tiene le mga coneccion en aquel pais.
Uno del mga librao victima ya admiti cay ya trabaja ya le antes na Malaysia usando falsificao documentos y con pago de P4,000.
Asegun con el NFWM cay con el 10 librao victima ya entrega sila na custodiya del “Women and Children Protection Center-Mindanao Field Unit”.
Con el mga librao victima ay ayuda mga personajes del Department of Social Welfare and Development y otros pa agencias de govierno para el documentacion y consejo. (B. Garcia. photo courtesy of NFWM)