Uno del tres victima el ya muri myentras uno del suspechao na dos incidente de tiroteo el ya aresta el pulisiya aqui na ciudad de Zamboanga.
El Zamboanga City Police Station 5 (ZCPS5) ya nombra con el muerto victima como si David Allian, 64 años el edad.
El dos irido victima ta incluwi el hermano menor de Allian si Nur, 62 años y si Gerale Plaza, 25 años el edad.
Base na investigacion del ZCPS5 cay con el man hermano Allian ya tira el un desconosido persona na Barangay Lunzuran, este ciudad, mga alas 2 del Biyernes modrogada.
Asegun con el ZCPS5 cay adentro na de ila residencia el man hermano Allian cuando ya entra el suspechao y enseguidas ya tira con el dos victima.
Asegun con el ZCPS5 cay si David enseguidas ya muri na lugar del incidente myentras su hermano, si Nur, admitido na ospital y bajo el curada medical.
Despues del incidente, asegun na informacion ya recivi el pulis cay el suspechao ya escapa caminando.
Ya recubri mga pulis na lugar del crimen tres capsula de calibre .45 pistola.
El ZCPS5 ta continua de ila investigacion para determina si quien el echor del incidente.
Asegun con el ZCPS7 cay con Plaza ya tira na Paseo de Mariano, Sitio Villa Margarita, Barangay San Roque, este ciudad mga alas 10:31 del Huwebes denoche.
Base na investigacion del ZCPS7 cay parao na un eskinita si Plaza cuando el suspechao que ta maneja motorsiclo ya para enfrente suyu y direpente ya tira con el victima.
Asegun con el ZCPS7 cay con el suspechao ya conose como si Sanal Juaini, 30 años el edad y residente del Paseo de Ruste, Barangay San Roque, este ciudad.
Asegun con el ZCPS7 cay con el victima ya lleva na hospital myentras con Juaini ya aresta mga pulis durante un “follow-up operation”.
Ya recubri cuatro capsula de calibre .45 pistola na lugar del crimen y asegun con el ZCPS7 cay agravio personal el motivo del incidente. (B. Garcia, photo courtesy of ZCPS5)