El Oficina del Presidential Adviser on Peace, Reconciliation and Unity (OPAPRU), ya distribuji aros con mga antes rebelde New People’s Army (NPA), con quien ta llama ahora como mga salvao amigos o “Friends Rescued (FRs), para ayuda mejora de ila vida.
El mga representantes del OPAPRU canda Peter Cheng y Hayriya Mohammad hunto con Tiniente Coronel Anshary Pumbaya, comandante del 44th Infantry Battalion (IB), ya facilita el distribucion del aros con mga “FRs” na quartel del 44IB na Barangay Lower Baluran, Imelda, Zamboanga Sibugay del Lunes.
Asegun con el 44IB cay total de 104 saco de 50 kilo aros el ya distribuji con 69 FRs.
“Este (aros) amo para ayuda canila suporta de ila vida cada dia como parte del programa de reintegracion del govierno y continua mejora de ila vida,” asegun con el 44IB.
El distribucion del aros ya concluwi con celebracion del “National Peace Consciousness Month” que tiene el tema de “Ang Kapayapaan ay Responsibilidad ng Bawat Mamamayan”. (B. Garcia) (Photo Courtesy of 44IB)
