Un oficial de barangay el ya aresta el mga autoridad na un campaña contra droga ilegal na provincia de Zamboanga Sibugay, asegun con el Philippine Drug Enforcement Agency (PDEA).
Si Maharani Gadaoni-Tosoc, el director regional del PDEA, ya nombra con el arestao suspechao como si Jomar Jailani, 48 años el edad y consejal del Barangay Tenan na municipio del Ipil, Zamboanga Sibugay.
Asegun con Gadaoni-Tosoc, con Jailani ya aresta na un “buy-bust operation” mga alas 3:05 del Lunes tarde na Purok Petrotex, Barangay Poblacion, Ipil.
Asegun con Gadaoni-Tosoc, si Jailani listao como el numero tres objetivo personalidad na campaña contra droga na provincial del Zamboanga Sibugay.
Si Gadaoni-Tosoc ya habla, ya confisca durante el aresto de Jailani mas o menos 50 gramos de suspechao shabu que tiene el valor de P340,000, a celpon, un llave, y P4,240 dinero de diferente denominacion.
Ya recubri tamen un balutan de “boodle money” que ya pone insima dos verdadero P500 como markao dinero.
El PDEA ya detene con el suspechao en preparacion para el plantada del asunto contra conele por violacion del “Comprehensive Dangerous Drugs Act of 2002”.
Asegun con Gadaoni-Tosoc, el buy-bust operation ya conduci con el suporta del policia del municipio del Ipil y “Police Drug Enforcement Group”.
(B. Garcia, photo courtesy of PDEA- Zamboanga Sibugay)