El mga autoridad ya aresta con un persona listao como objetivo de alto valor na un operacion contra droga na provincia del Zamboanga Sibugay, asegun con el Philippine Drug Enforcement Agency (PDEA) del Miercoles.
El oficina regional del PDEA, ya identifica con el arestao objetivo de alto valor como si Rey Apolinario Alsagon, 47 años el edad, y listao como el numero nueve na lista de objetivos na campaña contra droga.
Asegun con el PDEA, con Alsagon ya aresta na un operacion de compra busto mga alas 5:35 del Lunes tarde na Purok Malipayon, Barangay Taway, Ipil, Zamboanga Sibugay.
Ya confisca na posesion de Alsagon cuatro gramos de suspechao shabu enpaquetao na cuatro termosellada transparente plastico sobrecitos que tiene el valor de P27,200, tarjetas de identificacion de barangay, celpon, dinero de compra busto, y mga parafernales de droga ilegal.
Asegun con el PDEA, con Alsagon ya detene en preparacion para el plantada del caso contra conele por violacion del Ley Intergral de Drogas Peligrosas de 2002.
El operacion de compra busto ya conduci el mga operativas del PDEA con el suporta del diferente unidades del policia na provincia del Zamboanga Sibugay. (B. Garcia)