Un nuevo elejido barrio capitan el ya muri na un incidente de tiroteo na ciudad de Pagadian, provincia del Zamboanga del Sur, el policia ya reporta del Jueves.
El Mando Regional del Policia ya habla cay el incidente ya ocuri mga alas 6:38 del Miercoles denoche na Barangay Lapedian village, ciudad de Pagadian.
El policia ya nombra con el victima como si Rofoldo Dacol, 56 años el edad quien ya muri con un irida de tira na su estomago.
Base na investigacion del policia, si Dacol ta maneja un vehiculo de tres rueda conosido como el “bao-bao”, y para man parada ya cuando ya atraca el suspechao y ya tira con el victima usando calibre .45 pistola.
El suspechao, quien ta usa colorao camiseta y calson, ya escapa despues del incidente.
Con Dacol ya lleva na hospital para el curada medical pero ya declara conele muerto el doctor.
Si Fraynald, el anak de Dacol quien nuevo elejido Sangguniang Kabataan councilor na Lapedian, ya habla cay firmi ya tata ta recivi amenaso na vida antes de incidente.
El policia ta continua investiga para determina si quien el echor del incidente.
(B. Garcia)