Un negocianta el irido y librao de suyu anak na un incidente de tiroteo na provincia del Basilan, asegun con el policia del Sabado.
Asegun con el policia, el incidente ya ocuri mga alas 9:45 del Viernes denoche na Barangay Limook, ciudad de Lamitan, Basilan.
El policia ya nombra con el victima como si Jocelyn Lumata, 51 años el edad, un negocianta y residente del Barangay Sengal, ciudad de Lamitan.
El policia nohay mas nombra con el anak del irido negocianta.
Base na investigacion, ta maneja motorciclo si Lumata y ta sigi conele ancas de suyu anak cuando ya tira con el negocianta el uno del dos personas muntao na otro motorciclo que ta sigi canila atras na camino grande del Barangay Limook.
Asegun con el policia, ya tupa el tiro na cadera y izquierda pierna del negocianta y ya lleva conele na hospital para el curada medical.
El policia ya continua investiga con el incidente para determina el mga identificacion del mga suspechao, quien ya escapa despues del incidente. (B. Garcia)