Cuatro “high-value targets (HVTs)” el ya aresta y ya confisca P6.8 millon valor de droga ilegal el mga autoridad na provincia del Lanao del Sur, asegun con el Philippine Drug Enforcement Agency (PDEA) del Sabado.
Asegun con Gil Cesario Castro, el director del PDEA na Bangamoro Autonomous Region in Muslim Mindanao (PDEA-BARMM), con el mga aresta suspechao ya conose como canda Nawap Mohammad, 34 años el edad; Nursudin Bantak, Mamak Solaiman; y, Mustapha Soliaman.
Asegun con Castro, con el cuatro HVT suspechao ya aresta na un operacion de compra busto na Purok 5, Barangay Manila Group, Wao, Lanao del Sur, del Viernes.
Asegun con Castro, ya confisca na posesion del cuatro arestao suspechao un kilo de suspechao shabu enpaquetao na un bolso de papel de alumino con mga letra de Chino que tiene el valor de P6.8 millon, dinero de compra busto, un celpon, tres pitaka ta contene mga tarjetas de identificacion, P450 dinero de diferente denominacion, y un vehiculo.
Asegun con Castro, con el mga arestao suspechao ya detene na carcel del PDEA-BARMM en preparacion para el plantada del asunto contra canila por violacion del “Comprehensive Dangerous Drugs Act of 2002”.
Si Castro ya habla, con el cuatro ya aresta por medio del esfuerzo del entre-agencia de enforsador de ley que ya inclui el PDEA, policia, militar, y gobierno municipal del Wao, Lanao del Sur. (B. Garcia)