El gobierno local ta hace el necesario preparacion para el conducida del tres dias aka-24 National PESO Congress na ciudad de Zamboanga.
Asegun con el Alcalde John Dalipe, el congress hay conduci na Octubre 16 hasta 18, como parte del Zamboanga Hermosa Festival 2024.
Con el tres dias evento esperansao participa no menos de 1,200 participantes y partes interesadas desde Public Employment Service Office, Job Placement Offices, orador invitado y representantes desde mga oficina regional del Departamento de Trabajo y Empleo, o DOLE, na entero pais.
Si Dalipe ya reitera su suporta con el conducida del reunion nacional y ya diriji con el PESO del ciudad para asegura cay todo ya preparao para el tres dias evento por medio de colaboracion con mga concierne agencias.
Del Miercoles, si Dalipe ya man hunta con el mga oficiales del DOLE y mga administradores de PESO para determina el estado del preparacion del tres dias evento.
El PESO instrumental ayuda con mga Filipinos busca y empleos seguros na pais y na otro pais.
El establicida del PESO nga mga municipios, ciudad, provincias, ya formaliza por medio de Ley de Republica 8759 que ya promulga del Febrero 14, 2000. (B. Garcia)