El pulisiya local ya aresta con un mujer myentras ta saka ele “police clearance” na “Zamboanga City Police Office (ZCPO) Station 11” del ayer tarde.
El ZCPO Station 11 ya nombra con el arestao mujer como si Wenayda Moktar, 33 años el edad, dalaga, y residente de Barangay Sta. Barbara, este ciudad.
Asegun con el pulisiya local cay con Moktar ya aresta mga alas 4:56 Martes tarde myentras ta ase le el proceso para saka police clearance na ZCPO Station 11.
Con Moktar ya aresta despues que ya descubri el mga pulis designao na “clearance section” cay tiene le pendiente orden de aresto por el crimen de robo con P6,000 piansa.
El orden de aresto contra con Moktar ya dale el jusgado municipal del ciudad del Oktubre 19, 2022.
El acusao ta esta bajo na custodiya del ZCPO Station 11. (B. Garcia)