Un pulis ya iri despues que ya ase conele bangga el un motorista myentras ta conduci sila checkpoint del ayer alamadrogada alli na Barangay Zone 3.
El Police Station 11 ya nombra con el pulis como si Patrolman Ahmeddeedath Sahipa Salahuddin con kien ya ase bangga de motor si John Aziz Juhaili maga ala una cuarenta’y sinco ayer alamadrogada na Nuñez extension, Barangay Zone 3.
Asegun con el Police Station 11 cay si Salahuddin y su companiero, si Police Master Sergeant Niel Utam, ya llama el atencion de Juhaili y otro dos motorista cay ya desobedese sila leyes de trafico myentras el dos pulis ta conduci checkpoint na Nuñez extension.
Envez para, si Jahaili ya ase bangga con Salahuddin y el otro dos motorista ya escape.
Ya ase apas si Utam y ya puede le cuji con Juhaili con kien ya lleba hunto con su motorsiclo na Police Station 11 para el propio accion.
Con Salahuddin ya lleba na hospital para el atencion medical. (Jennyrose Delos Santos)