El 1102nd Infantry Brigade (1102Bde) ya designa mga soldao para guardia con el conducida del eleccion na municipio de Banguingui, Sulu, na Mayo 12, 2025.
Asegun con el 1102Bde, el mga soldao que ya designa na municipio de Banguingui amo el de 112th Division Reconnaisance Company (112DRC) que ta encabesa si Primer Teniente Dexter Mamma.
El ceremonia de despedida que ya conduci del Sabado na pantalan de Alayon, Barangay Tandu Bato, Luuk, Sulu, ya encabesa si Brigadier General Alaric Avelino Delos Santos, comandante del 1102Bde.
Asegun con Delos Santos, el mga personajes del 112DRC hay hace el crucial mision asegurando un pacifico y de orden proceso electoral na municipio de Banguingui.
Asegun con Delos Santos, el de ila presencia na municipio de Banguingui hay reinforza con el medidas de seguridad y defende con el sanctidad del eleccion.
“Ta comenda yo con mga galante soldao del 112DRC por el de ustedes inquebrantable compromiso en este mision. Mientras ta embarca ustedes con este crucial mandato, acorda cay hinde lang ustedes ta guardia con el proceso del eleccion pero ta salvaguarda tamen con el derechos de democratico del mga gente,” si Delos Santos ya habla na su mensaje.
“Tiene yo confiansa cay hay compli ustedes con el deberes con honor, profesionalismo, y integridad. El de ustedes mision es un testamento en el compartido responsibilidad que tiene quita para proteje con el de aton democracia,” si Delos Santos ya enfatiza.
Con el confiansa y confidendia del de ila mga lideres y el comunidad, el 112DRC ta esta preparao para hace de ila mision con maxima dedicacion. (B. Garcia)