El tropas del gobierno ta captura 24 mal elementos del sociedad, tres de ila irido, siguiendo el 30 minutos tirahan na provincia del Norte Cotabato, asegun con el militar del Sabado.
Asegun con el Western Mindanao Command (Westmincom), un soldao tamen el ya iri na tirahan que ya ocuri mga alas 4 del Jueves tarde na Barangay Bagolibas, Aleosan, Norte Cotabato.
Si Tiniente Coronel Edgardo Batinay, el comandante del 34th Infantry Battalion, ya habla cay antes del tirahan, ya recivi sila informacion cay tiene un grupo de mga armao personas el ta viaja abordo na tres vehiculos y tres motorciclos.
Asegun con Batinay, el no menos de 30 mga armao personas que ta encabesa canda alias Nasser y alias Montasser, ta viaja para na Sitio Tubak, Barangay Pagangan, Aleosan, Norte Cotabato.
Si Batinay ya habla, ya tene 30 minutos tirahan despues que ya conduci sila ofensiva que ya resulta na capturada del 24 mal elementos del sociedad.
Tres del 24 capturao mal elementos ya iri durante el tirahan. El de ila losdemas uban ya puede escapa.
Si Batinay ya habla, el mga tropas ya recubri dedes con el mga mal elementos del sociedad sinco rifles M-16, dos rifles M-14, un granada, siete bandoliers, bala, clips, y vehculos.
Asegun con Batinay, un soldao el ya iri durante el tirahan. Con el irido soldao conocido como si Corporal Roy Villaber ya lleva na hospital para el curada medical.
Si Batinay ya habla, con el mga arestao mal elementos del sociedad ya entrega na policia del Aleosan para el propio accion legal. (B. Garcia)